LAWAS TUTIR LALA BUNTE

Ta Ku Aran Lako Sia
Tutir Sopo Tu Dadara
Ka Kalis Desa Pamasar

Siong Dadara Biasa
Konang Bijan Tau Tingi
Nan Nya Singin Lala Bunte’

Bua Bunte’ Tu Kajuluk
Ngekeng Imung Mo Ke Balong
Baning Mara Bulan Buntar

Na Karante Idung Mata
Lukit Kalong Ka Tu Bokek
Nonda Dua Pang Masa Nan

Genra Cantik Ling Basa To
Barungan Sasir Mo Gili
Dadi Kamata Ling Tau

Mampis Intan Mo Barungan
To Lala Boto Si Ampo
Nesek Misar Nonda Taning

Lala Bunte’ We Sia Ee
Anak Tau Dadi Datu
Bakajuluk Datu Silang

Datu Silang Ta Intan Ee
Ka Marenta Ling Pamasar
Nan Nya Desa Subur Makmur

Nonda Tutir Tu Kasakit
Rayat Telas Ke Kasenang
Pade Antap Nomo Kawa’

Lagi Telas Datu Silang
Nomo Milin Ke Kasugi
Liuk Nanta Ling Kasenang

Tu Samalik Mo Tutir Ta
Lako Tutir Lala Bunte’
Nya Anak Sopo Sapolak

Kira Ling Sopo Sapolak
Kenras Lalo Mo Santurit
Me Rasate Ya Sanapat

Dalam Ling Sanompo Ngano
Beling Nanta Datu Silang
Lako Anak Lala Bunte’

Ao Anak Ku Ngekeng Ee
Mu Pina Ku Kenre Sesek
Sesek Kenang Benang Banjar

Pene Pina Mo Ling Lala
Kenre Sesek Benang Banjar
Era Kenang Lu Tamue

Benru Jira Mo Kenre To
Mimpat Nanta Datu Silang
Kenre Sesek Nonda Sama

Nan Nya Boto Lala Bunte’
Nonda Sai Ya Santaning
Mana Si Kalis Gili Lin

Sawai Sopo Sapolak
Balong Rema Mo Ke Boto
Wajar Si Nanta Santurit

Suru Pina Mo Ling Datu
Tane Tawa Lala Bunte’
Pina Kalis Mas Bulaeng

Mas Bulaeng Dadi Tanda
Panyayang Datu Ko Anak
Pola Ke Sopo Sapolak

Siong Bae Kenre Lamung
Kenre Alang Ya Pina Si
Cipo Cinde Na Karante

Nonda Dua Mo Tu Nesek
Bau Talo Maong Lala
Basa To Bakat Alami

Rungan Ngekeng Lala Bunte’
Imung Ampo Mo Ke Boto
Katara Mo Ling Gili Lin

Dapat Mo Sanompo Waya
Tamue Datang Ko Datu
Sate Sumping Lala Bunte’

Tau Siong Sopo Dua’
Datang Kalis Sasir Gili
Tau Gili Lin Menan Si

Sai Po No Bakamata
Tulang Genra Lala Bunte’
Mata Rapang Ka Tu Cila’

Baridung Alis Ke Mancung
Parana Lanang Satekal
Lukit Tenrang Ke Jarening

Lukit Alis Nonda Dua
Tu Rapang Sari Siong Si
Puti Balakas No Soka

Barape Lelas Baseda
Mana Ngamuk Nonda Mantung
Edab Lebe Ke Tau Lin

Kabali Gita Lako Kidat
Tu Rapang Semit Bariring
Lala Bunte’ We Gilae

Rame Desa Ling Tamue
Datang Kalis Sasir Gili
Sate Sumping Lala Bunte’

Sarea Sate Bakamaeng
Sole Ke No Bawa Tanja
Pasang Ke Sate Barengas

Pening Otak Datu Silang
Tulat Tau Bawa Karong
Nomo To Cara Ya Nimang

Bua Dadi Pening Otak
Tamue Siong Biasa
Konang Anak Dea Datu

Beling Mo Nanta Ko Anak
Pili Keme Sala Sopo
Lema Boe Mo Panyakit

Lamin Pang Aku Anak Ee
Me Leng Kau Si Ku Turit
Pang Kau No Baroba

Samung Mo Ling Lala Bunte’
Me Luk Cara Ya Kupili
Rena Nonda Dalam Ate

Samung Mo Ling Lala Bunte’
Me Luk Cara Ya Kupili
Rena Nonda Dalam Ate

Kenang Apa Po Kasugi
Lamin Sipak Bawa Kenras
Batin Era’ Ya Batengka’

No Mo Aku Bale Para
Sampanang Bao Sak Ate
Balong Ku Mara Nyang Lagi’

Tulang Gita Gama Bapa’
Tau Sate Saling Lemat
Palio Tu Nonda Sate

Benru Menong Lala Bunte
Ilang Arap Datu Silang
Pola Sate Ada Nantu

Beling Mo Lako Tamue
Maaf Ku Gama Intan Ee
Era’ Mo Datang Kabali

Lala Bunte’ No Po Roa
Tu Sukat Mana Ke Sai
Sabar Mole Mo Dunung

Tu Samalik Mo Sia Ee
Lako Tanang Lala Bunte’
Rasa Ka Mole Tamue

Pina Mo Sopo Rancana
Sate Lalo Bilin Desa
Mena Tutit Ling Tu Peno’

Bua Ku Lo Bilin Desa
Siong Si Mara Tu Peno
Rusak Ate Nonda Jangi

Dapat Mo Ling Ka Rancana
Ngarabo Mo Tu Badesa
Sate Gita Lala Bunte’

To Nya Lala Barangkat Mo
Bilin Desa We Gila Ee
Bekas Pamendi Ko Tau

Kenras Jina Ka Pamendi
Jangka Lalo Bilin Desa
Mena Tumung Mo Su Basu

Rame Datang Tu badesa
Ode Rea Loka Beru
Sate Antat Lala Bunte

Joa Perjaka Lengkap Mo
Imung Ampo Sedo Gaso
Timal Ling Dalam Palangan

Harta Nani No Kamilin
Samentan Ling Datu Silang
Dadi Mawa Lala Bunte’

Antat Jangka Lawang Desa
No Monda Tau No Nangis
Pendi Jangi Lala Bunte’

Ta Ku Lalo Mo Bapa Ee
Ampin Pendi Ku Gama Na
Ada Umir Ku Mole Si

Tutir Ling Dalam Palangan
Mikir Ate Lala Bunte
Kome Kira Ya Ku Ngusi

Usi Diri Ko Desa Lin
No Si Beda Ke Pamasar
Masi Tutit Si Ling Tau

Ling Palangan Mo Sia Ee
Datang Pikir Lala Bunte
Sate Pina Tokal Ngusi

Turin Mo Nanta Parenta
Ko Ulin Joa Perjaka
Satompok Batu Ke Tana’

Batu Antin Dadi Bale
Maris Mo Tapin Ke Tana
Dadi Rapang Sopo Olat

Ling Bao Pina Mo Lawang
Langan Tama Lako Dalam
Nan Katokal Lala Bunte

Rombongan Nurit Si Tama
Lengkap Mo Ke Sedo Gaso
Imung Ampo Mas Bulaeng

Sopo Tau Mo Pang Luar
Tukang Jaga Olat Batu
Bale Nanta Lala Bunte

Nan Mo Tau We Gila Ee
Tukang Antat Jangan Kakan
Min Ka Nyempit Datu Silang

Tutir Dapat Mo Sabulan
Nomonda Senda Ya Menong
Maris Bada Datu Silang

Maaf Ku Gama Rua Na
Sila Penok Lala Bunte
Nomonda Senda Ku Menong

Lalo Nanta Datu Silang
Iring Mo Ling Kaluarga
Ko Katokal Lala Bunte’

Entek Lako Bao Olat
Penri Lawang Tenris Tama
Kareng Tampo Ling Kamimpat

Mimpat Rena Mo Kamelas
Gita Anak Kamo Mate
Rapang Tau Nyaman Tunung

Siong Mesa Lala Bunte
Tu Peno Dapat Si Mate
Mara Tau Ka Bajangi

Rabasa Nanta Datu Silang
Oo Sarea Rama Peno
Na Langan Jangi Mara Ta

Jangi Apa Po Jangi Ta
Bilin Desa Lalo Mate
Sole Rapang Talat Diri

Olat Batu Nan Sia Ee
Pina Dadi Kubir Massal
Lala Bunte Ke Rombongan

Lima Kilo Lis Pamasar
Nan Katokal Olat Batu
Bale Kubir Lala Bunte

Ling Bao Olat Sia Ee
Jangka To Masi Tu Gita
Batu Mesan Lala Bunte

Ada Mo Tutir Saman Ta
Peno Tau Sate Bongkar
Olat Kubir Lala Bunte

Bongkar Sate Ete Isi
Barisi Emas Bulaeng
Panising Datu Ko Lala

Boe Cara Tau Peno
Ete Harta Lala Bunte
Lamin No Sakit Ba Mate

*
Lamin Ujan Mo Ke Guntir
Tanda Ya Datang Ba Rea’
Kayu Tumung Mo Baseli

Nan Mo Loe Ku Batutir
Maaf Ku Gama Min Sala’
Era Tu Sambung Kabali

( AZM)