LAWAS TUTER DATU UTAN

Kewa Ku Sangayap Sukur
Ko Repan Nene’ Koasa
Ku Samula Mo Tuter Ta

Tuter Ka Datu Marenta
Ling Gili Tana Samawa’
Lema Sama Mo Tu Paham

Tu Samula Kalis Bao
Ling Dinasti Awan Kuning
Datu Ka Mula Marenta

Masa Dewa Awan Kuning
No Poda Tau To Tutir
Pola Nonda Tu Ka Tulis

Nan Po Ada We Sia Ee
Saman Dewa Maja Purwa
Catatan Bau Tu Tutir

Be Ta Mo Mula Ka Tutir
Diri Dewa Maja Purwa
Sepakat Ke Raja Goa

Sepakat Saling Mo Jatu
Jatu Balong Desa Darat
Lema Aman Sarea Luk

Lengit Dewa Maja Purwa
Pina Ganti Ke Mas Goa
Maris Mo Pimpin Samawa

Konang Nanta Mo Mas Goa
Nomongka Le’ Marenta
Santurin Ling Tau Peno

Sabarenang Dadi Datu
Ling Ka Mangkir Ko Amanat
Imung Bolang Lako Olat

Olat Tokal Lalo Bolang
Rema Ke Joa’ Parjaka
Kena Ling Utan Sia Ee

Dalam Buk Tana Samawa
Tutir Ka Tanang Mas Goa
Tin Enam Olas Pitu Telu

Mas Goa Mo Intan Ee
Pina Mo Katokal Tendu
Poto Pedu Dadi Desa

Pina Benteng Desa Darat
Kalis Planing Ko Manini
Tenris TaganeBatu Nisung

Kaliung Ko Raja Borang
Maris Mo Ko Bara Lembu
No Rawi Jangka Rong Dumpu

Gila Nanta Mo Mas Goa
Sijar Tau Balong Tekad
Mana Lo Bolang Nonda Su

Mas Goa Datu Kasuda
Ling Dinasti Awan Kuning
Purang Mula Tu Marenta

Ling Utan We Sia Ee
Mas Goa Pina Mo Datu
Raja Ode Min Basa To

Marenta Nanta Diri Nan
Jatu Jatan Desa Darat
Adil Makmur Nan Tujuan

Utan Dadi Kerajaan
Lasir Mo Takit Leng Tau
No Sambarang Tu Sangkual

Sa Ten Mo Le Balangan
Desa Pina Lako Lemak
Nong Ling Baringin Sila

Mula Nanta Ka Rapina
Datu Utan Tama Islam
Turit Mo Ling Rama Peno

Benru Islam Mo Mas Goa
Utan Tama Ko Samawa
Mengkasar Sempit Utusan

Utusan Bawa Kabalong
Saling Jatu Desa Darat
Sakompal Diri Ko Sopo

Kamana Si Pet Gila Ee
Lamin Tawa Desa Darat
Sopo Mana Tu Ganua’

Nan Mo Basa Datu Utan
Alu Nanta Tu Mengkasar
Ka Rengang Dadi Mo Rapat

Jangka Mo Lengit Nanta Na
Tau Utan Tama Mo Islam
Mas Cini Gentan Mas Goa

Datang Mo Nanta Ulama’
Ajar Tau Ngaji Ngetan
Imung Boat Uma Tana’

Telu Datang Kalis Banten
Fakeh Usman Ke Ismail
Rema Ke Maulana Ali

Ada Si Lis Kalimantan
Ulama Bima Datang Si
Imung Datang Lis Samawa’

Ulama Pina’ Masigit
Keban Lapan Bangun Si
Maris Pungka Uma Tana’

Remban Mula Ka Yapina
Sasingin Ke Remban Aji
Maris Mo Pina Remban Rea’

Remban Rea’ Otak Benrang
Pina’ Ling Baringin Sila
Jangka To Masi Tu Gita’

Jira Remban Kareng Lapan
Pina Singin Lapan Rea’
Dadi Mo Lapan Panising

Sanising Ko Tau Mudi
Kenang Ai Uma Tana
Lema Bau Sejahtera

Benru Dadi Lapan Rea’
Balabar Tu Pungka Uma
Pola Sate Nyaman Telas

Ai Benrang No Mo Mate
Sijar Nonda Tu Marau
Basewal Mo Ke Saman To

Nan Panising Tu Sapuan
Benrang Rea’ Lapan Rea’
Imung Uma Kemban Angkum

Ada Mo Singin Orong Bako
Orong Sele Uma Pungka
Uma Bage Orong Tenga’

Masi Si Tuter Panising
Kapang Nanta Tau Loka
Nan Singin Sadeka Orong

Jangka To Masi Si Peno
Tu Utan Sadeka Orong
Nan Mo Tanda Tau Sukur

Sukur Mole Pade Antap
Palajar Kapang Ulama’
Maris Dadi Tradisi

Sumber : AHMAD ZUHRI MUHTAR

http://www.facebook.com/groups/pedulidesadarat/

sapalah kami dengan komentar anda

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s